Геннадий Красильников - Удмурт кылэз но литератураез

Геннадий
Красильников
(1928–1975)
Геннадий Дмитриевич Красильников вордиськиз Алнаш
черкогуртын. Алнашысь шор ёзо школаез йылпумъяса,
Ленинградысь связья училищее дышетскыны пыриз вал, но
тазалыкез лябен отысь бертоно луиз. Собере кык ар Алнаш
детдомын воспитатель луыса ужаз. Огвакыт артистлы
дышетскыны малпа вал, но конкурс пыр оз ортчы.
• 1952-ти арын Геннадий Красильников пыриз
дышетскыны Москваысь М. Горький нимо
Литературной институтэ. Москваын дышетскон
аръёсыз тунсыкоесь но емышоесь вал. Со тодмо
писательёс полын но тунсыко тодосчиос дорын
дышетскиз, трос зуч но кунгож гожъяськисьёсын
пумиськылиз но кенешылиз. Институтын литература
омырен шоказ, тужгес но шунытскон («оттепель»)
вакытлэн эрико омыреныз.
1953: Литературае
пырон.
«Москваын дышетскон аръёсыз ик егит прозаиклы
искусство удысысь выль мертэтъёсыз но куронъёсыз
валаны юрттизы. Соос герзаськемын вал огшоры
адямилэсь дунзэ, улон философизэ но пушдуннезэ
суредан амалъёсын» /Удм лит. 2008: 189/. Татын
1953-ти арын со веросъёсын нырысети сборниксэ
поттэ, кудиз нимаське «Огшоры нунал». Та
веросъёсаз автор огшоры адямиез огшоры
югдуръёсын возьматиз, та ласянь со зуч
литератраысь «деревенская проза» орлы матын
луэмзэ возьматиз. Геннадий Красильников азьланяз
но веросъёс гожъямысь оз дугды.
Студент дыръяз ик со гожтиз нырысети повестьсэ – «Вуж
юрт». Та кузьмадёс Красильниковлэн диплом ужез вал.
Повестьын валтись интые потэ егит Олексанлэн ас анайатаеныз конфликтэз. Прозаик реализм амаллэсь портэм
луонлыкъёссэ уже кутиз, угось отын полэстисько
соцреализмлэн но, критической реализмлэн но, магической
реализмлэн но (Макар Кабышев бырыку, тылобурдоез,
позыртиськем писпуэз, синтэм валэз, горд кузьылиез
возьматон) тодметъёссы.
Дышетсконзэ йылпумъяса, Геннадий Красильников Алнаше
ужаны но улыны бертиз. Та вакытэ со профессиональной
гожъяськись, мерлыко ужась но депутат вал. Геннадий
Красильниковлэн улоназ «алнаш вакыт» тужгес но шудоез
вал, дыр. Та аръёсы со гожтиз «Толсяська» романзэ, кудиз
«Вуж юрт» повестьлэн кыкети люкетэз луэ. Прозаик азьвыл
жутэм ужпумъёсты паськытатэ но муромытэ, вуж улонлэсь
– «вуж юртлэсь» – инъетъёссэ вашкала вакытысь гинэ уг,
туала вакытысь но шедьтыны быгатэ.
1957–1963: Алнашын.
Алнашын улыкуз ик Красильников поттэ «Тонэн кылисько»
повестьсэ, кытын валтись герой, Алёша Курбатов, городэ
дышетскыны пырыны оз быгаты но гуртаз ужаны берытсконо
луиз. Выль сямен ужакуз, гуртысь адямиосты Алёша мукет
сямен адзе но гурт ужез дунъяны кутске.
1963-ти арын Г. Красильниковез Удмуртиысь Писательёслэн
огазеяськоназы торое быръё, соин валче 1964-ти арын со Ижкаре
улыны выже. Иже лыктыкуз, со оске, удмурт литератураез азинтонын
трос луонлыкъёс усьтисько шуыса, но озьы уг пормы: мерлыко уж
таланто прозаиклы шокчон дыр но уг сёты. Ижевскын улыкуз, Г.
Красильников «Арлэн кутсконэз» романзэ печатла. Романын кык
портэм философиен улись эмъясьёс суредамын: огласянь, арлыдо но
трос шуг-секытъёс пыр ортчем главврач Алексей Соснов, кудиз понна
уж но адямилэн висёнэз, куректонэз нырысь интыын; мукет ласянь,
егит но визьмо, кескич, ассэ яратись но кивалтон уж сярысь малпась
хирург Световидов, кудизлэн аслаз улон философиез (та ласянь
Световидов матын луэ Л. Леоновлэн «Русский лес» романысьтыз
Грацианскийлы, В. Астафьевлэн «Царь-рыба» мадёсысьтыз Гога
Герцевлы но мук.).
1963 бере: Ижевскын.
Г. Красильников весь выльзэ утчаз, со тужгес но шодиськиз
пичи жанръем ужъёсаз. Кылсярысь, «Кошкисез мед кошкоз»
верос пумысен бадзым кылож жутиськылиз, кудиз туннэ
нуналозь но оз чалмы ай .Красильниковлэн берпумети ужез –
зуч кылын гожтэм неоверос – Рваные сны. Куд-ог критикъёс
(А. Зуева, Н. Лекомцева) отысь экзистенциализмлэсь
тодметъёссэ но висъяло.
Г. Красильников трос малпанъёссэ быдэстыса оз вутты. Секыт
висьыса, 1975-ти арын оштолэзе со улонысь кошкиз.