Акафист преподобному Владимиру, игумену Белопесоцкому Кондак 1 Избранный чудотворче и воине Христов, устроителю обители предивныя, наставниче монахов и собеседниче ангелов! Похвальное пение приносим ти, преподобне отче наш Владимире, ты же, предстоя Престолу Господа славы, моли о нас, прославляющих тя с любовию и умиленно вопиющих: Радуйся, Владимире, Белопесоцкий чудотворче. Икос 1 Ангел земный и человек небесный воистинну был еси, преподобне отче наш Владимире, издетска бо страху Божию родители твоими наученный, в преподобии и правде во вся дни живота твоея неленостно Господеви поработал еси. Мы же, удивляющеся равноангельному житию твоему, прославляем тя сице: Радуйся, земли Тверския прозябение святое; радуйся, града Ржева отрасль пречестная. Радуйся, славных родителей плод боголюбезный; радуйся, лучами Трисолнечнаго света озаренный. Радуйся, любовь к добродетели от младенчества явивый; радуйся, на служение Христово сердце твое устремивый. Радуйся, писаньми божественными душу твою напитавый; радуйся, вся благая мира сего ни во что же вменивый. Радуйся, Владимире, Белопесоцкий чудотворче. Кондак 2 Видев, преподобне, яко образ мира сего преходит и всякая житейская сладость причастна печали в нем бывает, восхотел еси Христу Богу послужити и Тому единому последовати. Сего ради и во обитель Хутынскую стопы твоя направил еси, идеже, усердно в молитве подвизаяся, Богу взывал еси: Аллилуиа. Икос 2 Разум, зарями Духа Святаго просвещаемь, стяжал еси, богомудре, и евангельски Бога, в Триех Ипостасех певаемаго, всем сердцем возлюбил еси, темже, очи твои к Свету горнему и вечному вперив, яко верный раб, пред Господем ходил еси. Помози убо нам добрым подвигом подвизатися, тя прославляющим и сице вопиющим: Радуйся, евангельскаго учения истинный последователю; радуйся, закона Божия усердный исполнителю. Радуйся, рабе верный и незлобивый; радуйся, пастырю добрый и чадолюбивый. Радуйся, сосуде Божия благодати избранный; радуйся, многими добродетельми украшенный. Радуйся, древних отцев добрый ревнителю; Радуйся, обители святыя мудрый устроителю. Радуйся, Владимире, Белопесоцкий чудотворче. Кондак 3 Сила Вышняго, немощная врачующи и оскудевающая восполняющи, укрепи тя, преподобне Владимире, егда восприял еси монашеский образ и основание крепкое лествицы добродетелей поставил еси. Мы же, зряще таковое тщание и усердие о спасении души твоея, Всесильному Богу со умилением поем: Аллилуиа. Икос 3 Имуще тя, преподобне Владимире, теплаго молитвенника и скораго в бедах помощника, благовернии людие, иноки и инокини в скорбех и напастех тя в молитве призывают и, помощь вскоре улучивше, благодарне тебе вопиют: Радуйся, в скорбех наших утешение предивное; радуйся, обители твоея заступление незримое. Радуйся, иноков, добре подвизающихся, учителю; радуйся, общаго жития их устроителю. Радуйся, Христа всем сердцем возлюбивый; радуйся, жизнь твою за Него отдати готовый. Радуйся, болящих врачу скорый и безмездный; радуйся, наставниче премудрый и прозорливый. Радуйся, Владимире, Белопесоцкий чудотворче. Кондак 4 Бурю злых напастей усердною молитвою укрощая, на высоту добродетелей восшед, возсиял еси, отче Владимире, яко светильник на свещнице поставленный. Темже и сана священства удостоился еси и послушания ради игуменство восприял еси, со смирением взывая к Богу: Аллилуиа. Икос 4 Видевше людие ангелоподобное твое житие, отче Владимире, разумеша тя истиннаго постника и правило известнейшее добродетели, сего ради и прихождаху, послушати сладкогласная твоя словеса. Мы же, чада твоя, почитающе память твою, дерзаем глаголати сице: Радуйся, воине Христов непобедимый; радуйся, рабе Его благий и верный. Радуйся, молитву, яко щит, стяжавый; радуйся, демонския прилоги тою отражавый. Радуйся, призывающим тя скорый послушателю; радуйся, молитв их скорый исполнителю. Радуйся, алтаря Господня усердный служителю; радуйся, иноков добрый пастырю и мудрый учителю. Радуйся, Владимире, Белопесоцкий чудотворче. Кондак 5 Боготечная звезда, в нощи жития сего присно светящая, явися обитель твоя, преподобне Владимире, юже ты в пределех земли Московския в похвалу Пресвятыя Троицы создал еси, в нейже мнозии иноцы, добрым подвигом подвизавшеся, Богу хвалу приношаху, поюще песнь: Аллилуиа. Икос 5 Видев, преподобне, яко вера в земли Русстей угасает и Праведный Судия грехов ради беды и скорби попускает, глаголал еси: Покайтеся, да не прогневается до конца Господь, не хощет бо смерти грешника, но еже обратитися и живу быти ему. Сия глаголы разумевше, мнози на путь правый возвратишася, темже и воспеваху тебе: Радуйся, покаяния и жизни по Бозе проповедниче; радуйся, бедствующим скорый помощниче. Радуйся, ходатаю нашего спасения; радуйся, богомудрый учителю терпения. Радуйся, скорбящих приятное утешение; радуйся, немудрых скорое вразумление. Радуйся, грехов и страстей смиренный обличителю; радуйся, Евангелия Христова усердный благовестителю. Радуйся, Владимире, Белопесоцкий чудотворче. Кондак 6 Проповедует обитель Белопесоцкая труды и подвиги твоя, преподобне, спасения ради души твоея подъятыя. Воистинну, древним отцем подражая, пустыни прозябение многоплодное явился еси, дарами Духа Святаго украшенный, Егоже действием многая и преславная чудеса совершил еси, подвизая верных воспевати Богу: Аллилуиа. Икос 6 Возсиял еси, яко светильник пресветлый, во обители твоей, богомудре отче Владимире, многия иноки на стезю спасения наставляя и всех приходящих к тебе с любовию утешая, яви бо тя Христос мудраго наставника и учителя пустыннолюбнаго. Сего ради приносим ти похвалы сия: Радуйся, пустынниче, мирскую честь презревый; радуйся, подвижниче, древним отцем подражавый. Радуйся, православия и благочестия предобрый учителю; радуйся, жития иноческаго мудрый устроителю. Радуйся, трудолюбия усердный наставниче, радуйся, недугов телесных и душевных целебниче. Радуйся, Пречистыя Богородицы верный служителю, радуйся, теплый о нас пред Богом предстателю. Радуйся, Владимире, Белопесоцкий чудотворче. Кондак 7 Хотя спасти душу твою, преподобне Владимире, сам себе в жертву приятну Господеви принесл еси, имея дух сокрушен и сердце смиренно. Темже и Бог тя прослави и дарова часть со святыми в Царствии Небеснем, идеже с ними, радостно ликуя, поеши песнь: Аллилуиа. Икос 7 Новаго тя ходатая, святе Владимире, пред Престолом Божиим стяжахом, ты бо в житии твоем Пресвятей Троице усердно послужил еси и в Еяже честь обитель чудную устроил еси, идеже ныне боголюбивыя инокини усердно подвизаются. Сего ради прославляем тя сице: Радуйся, земли Московския похвало и утверждение, радуйся, обители Пресвятыя Троицы присное заступление. Радуйся, подвизающимся в ней благодатное вспоможение. радуйся, сущим в скорбех и печалех скорое утешение. Радуйся, Бога в Триех Ипостасех всем сердцем возлюбивый, радуйся, Отца Небеснаго в житии твоем прославивый, Радуйся, Сына Божия благочестно исповедавый, радуйся, Духу Святому верно поклонивыйся. Радуйся, Владимире, Белопесоцкий чудотворче. Кондак 8 Странное и преславное знамение благоволения Божия зряще, прославляем тя, преподобне отче наш Владимире. Се бо днесь, яко же древле, притекающим к тебе с верою утешение в скорбех подаеши, от бед избавляеши, от напастей сохраняеши и всякое прошение во благо исполняеши, подвизая Богу воспевати песнь: Аллилуиа. Икос 8 Все плотское желание духу покорив, телесныя страсти мужественне победил еси, преподобне отче Владимире, и, яко безплотен на земли пожив, в Небесных селениих со ангелы водворился еси. Темже, удивляющеся таковому житию твоему, прославляем тя сице: Радуйся, страстей душевредных искоренителю; радуйся, послушания смиренный любителю. Радуйся, умерщвлением страстей миру умерый; радуйся, себе самаго в жертву Богу принесый. Радуйся, ангелов собеседниче и преподобных сопричастниче, радуйся, Небеснаго Царствия достойный наследниче. Радуйся, тленная и скорогибнущая презирати поучаяй; радуйся, горняя, а не земная, мудрствовати наставляяй. Радуйся, Владимире, Белопесоцкий чудотворче. Кондак 9 Всякое тщание прилагал еси в житии твоем, богомудре Владимире, еже возгражденную тобою обитель, яко благоплодный вертоград, соделати, да вси, хотящии в ней усердно подвизатися, плоды трудов твоих наслаждаются, воспевающе Богу: Аллилуиа. Икос 9 Ветии многовещаннии века сего не могут постигнути жизни сокровенныя во Христе, еже мир презирати и плоть свою умерщвляти. Ты же, преподобне, невозвратным помыслом течение жизни твоея совершил еси и блаженства вечнаго достигл еси. Помози убо и нам искати прежде Царствия Небеснаго и правды его, прославляющим тя сице: Радуйся, Христа ради плоть твою умертвивый; радуйся, премудрых века сего посрамивый. Радуйся, любомудрия духовнаго подателю; радуйся, чистоты сердечныя усердный хранителю. Радуйся, во бранех духовных пособниче; радуйся, во искушениих скорый помощниче. Радуйся, грешником пути ко спасению указателю; радуйся, за мир грешный пред Богом предстателю. Радуйся, Владимире, Белопесоцкий чудотворче. Кондак 10 Спасти хотя люди, притекающия к тебе, прехвальне отче Владимире, поучал еси, еже веру Православную чисте соблюдати, Бога всею крепостию любити и безпорочно житие провождати. Ныне же, Престолу Божию предстоя, еже в земли Российстей Православию утвердитися, отечеству нашему в мире и благоденствии пребывати, обители твоей сохранитися и всем нам спастися, да со всеми святыми воспеваем хвалебную песнь: Аллилуиа. Икос 10 Стена спасительная в древняя времена бысть обитель твоя, преподобне, от мрака греховнаго и языческаго суеверия люди отвращающи и пределы Московския от иноверных защищающи. В последняя же лета попущением Божиим поруганию от безбожных предадеся, но паки возродися, идеже боголюбивыя сестры, обеты иноческия исполняюща, тя прославляют сице: Радуйся, источниче святый, духовную нашу жажду утоляяй; радуйся, елею божественный, сердца наша умягчаяй. Радуйся, искро, огонь любве в душах возжигающая; радуйся, ниво, благодатным хлебом нас питающая. Радуйся, целомудрия и чистоты рачителю; радуйся, гордости и неверия искоренителю. Радуйся, в недоумении мысль благу на сердце полагаяй. радуйся, трезвению и непрестанней молитве нас научаяй; Радуйся, Владимире, Белопесоцкий чудотворче. Кондак 11 Пение хвалебное, в похвалу тебе составленное, не презри, преподобне Владимире. Днесь бо, иконе твоей предстояще, с верою и любовию ублажаем тя, яко заступника нашего и предстателя. Темже и молимся: не остави нас сиры и безутешны, но помози, еще в странствии сущим, безбедне море жития сего преплыти и Вышняго града, Иерусалима Небеснаго, достигнути, идеже вкупе с тобою сподобимся воспевати песнь: Аллилуиа. Икос 11 Светоносным Троическим сиянием свыше озаренный, святе Владимире, просвети и наша сердца, тьмою греховною омраченная, да елеем благих дел возжегше угасшая наша светильники, яко мудрыя девы, сподобимся брачнаго Христова чертога, идеже ты со всеми святыми пребываеши. Темже и вопием ти: Радуйся, свеще, огнем Божественныя благодати возжженная; радуйся, чаше, токи милосердия Божия нам изливающая. Радуйся, искушаемым от мира, плоти и диавола поможение; радуйся, телес наших здравие и душ спасение. Радуйся, великаго князя, апостолом равнаго, имя носивый; радуйся, игумену земли Русския в подвизе подражавый. Радуйся, Небеснаго Сиона достойный жителю; радуйся, пред Престолом Божиим наш теплый предстателю. Радуйся, Владимире, Белопесоцкий чудотворче. Кондак 12 Благодати Божия сосуд избранный быв, преподобне Владимире, благодать Пресвятаго Духа и нам испроси, да присно покрыет нас от врагов видимых и невидимых. Научи, святче, подражати тебе в чистоте и незлобии, да сподобимся узрети славу Триипостаснаго Божества, воспевающе победную песнь: Аллилуиа. Икос 12 Поюще многия милости и преславная чудеса твоя, богоблаженне Владимире, хвалим, благодарим и величаем прославльшаго тя Господа, дивнаго во святых Своих. Тебе же, верному и благому рабу Его, от любве сердечныя вопием тако: Радуйся, течение постническое добре скончавый; радуйся, путем правым непреткновенно шествовавый. Радуйся, не словом точию, но паче житием поучавый; радуйся, иноком путь истинный ко спасению указавый. Радуйся, уныние молитвою и бдением врачевати научаяй; радуйся, лукавыя козни вражия распознавати нам помогаяй. Радуйся, по преставлении твоем присно с нами пребываяй; радуйся, во славе Небесней Престолу Пресвятыя Троицы предстояй. Радуйся, Владимире, Белопесоцкий чудотворче. Кондак 13 О, предивный угодниче Христов, богомудре отче наш Владимире! Приими малое сие и недостойное моление, от усердия тебе приносимое, и умоли Господа сил, да милостив будет неправдам нашим и будущих избавит мучений нас, в покаянии зовущих: Аллилуиа. (Трижды). Молитва О, преславный угодниче Христов, преподобне отче Владимире, премудрый наш наставниче, обители Белопесоцкия начальниче и земли Ступинския покровителю! Яко имеяй дерзновение ко Владыце Христу и Пречистей Его Матери, буди молитвенник теплый о нас, недостойных, подвизающихся во святей обители твоей, и всех, с верою притекающих на место сие, идеже многолетне телом почиваеши. Испроси, богомудре, пастырем ревность и попечение о пасомых, монашествующим споспешествуй в ангелоподобном житии, утешая их в скорбех и печалех и милостивно подкрепляя в болезнех, заступи от всех бед и напастей верная чада твоя, сохраняя от враг видимых и невидимых. Наипаче помолися, святче Божий, Достопоклоняемей Троице, Ейже ты усердно во временней жизни послужил еси, в земли Российстей Православию утвердитися и отечеству нашему в мире и благоденствии пребывати. Нас же всех, почитающих святую память твою, настави в земнем странствии на путь спасения и управи к Царствию Небесному, да тамо вкупе с тобою и всеми святыми прославим Отца, и Сына, и Святаго Духа, ныне и присно и во веки веков. Аминь. Тропарь, глас 5: Вышним благословением укрепляемь,/ в пустыню вселился еси,/ идеже, ангельски пожив,/ плотское мудрование духу покорил еси./ Видя Господь подвиги твоя,/ вождя дружины духовныя постави тя,/ земли же Московстей в защиту и ограждение./ Ныне, предстоя престолу Пресвятыя Троицы,/ богомудре отче Владимире,/ моли спастися душам нашим. Кондак, глас 2: Мирския суеты отрешився,/ в постнических подвизех добре потрудился еси/ и, яко крин, в пустыни процвел еси,/ идеже обитель Живоначальныя Троицы воздвигл еси,/ отче преподобне Владимире,/ земли Московския похвало и украшение.