Пингсь моли инголи, шуди валом инсарка ляйняньке

Пингсь моли инголи, шуди валом Инсарка ляйняньке. Тянь
колга Анна Михайловна тяда инголе ашезь арьсекшне. Шить
полафнезе весь, веть полафнезе шобдавась. Вов тяфта афи
шарьхкодсь, кода эрязста ётасть Анна Михайловнать кизонза и
малаткшнихть кафксогемонь ветети.
Анна Мнхайловна Ерочкинась шачсь Мокшень Пою велеса, ашу
крестьянскяй семьяса. Тядяц содама шити ашезь сода, а аляц
аделась Саранскайса совпартшкола. Сяс стирнясь рана ушедсь
книгань лувома, тя тевти тонафтозе сонь аляц. Эсь велесост Анна
Михайловнась аделась ниле класст и вачашить эзда тусть
павазонь вешема Ивановскяй области Тинешма ошу, но тосонга
нужась ласькондсь кудста кудс. Тинешма ошса эрясть колма
кизот. Сисемце классонь аделамда меле стирнясь ёрась тумс
тонафнема медицинскяй училищав, но курокста ушедсь войнась.
Мзярда ушедсь войнась, тядязе ашель кудса, тушендсь
мокшэрзянь краи васедема. Алязень сявозь войнав. Минь илядоме
кулу брадозень мархта кафонек. Шачема – касома вастознк
пачкотькшнеме почти ков. Пака сашендоме шачема вели, няеме
пяк лама нужада и сталмода.
Велеса эрямась ульсь стакадонга – стака, ломаттнене вачедот.
Тёжянь вейхкса сятт нильгемонь омбоце кизоня, тядязень вастс
монь прважамазь торфу покодема Свердловск ошу. Ялгане ульсть
эряфкшу ават, а тейне ульсь кеветие киза. Путомазь покодема
стелькань ацама. Тя тевсь ульсь пяк стака, инголи тоса покодсть
алят, а мзярда ушедсь войнась алятнень вастснон занязь од
стирнятне и автне. Кшида макссесть ниле сятт грамма, пялес
вачеда якаме покодема. Торфса мон покодень кафтошка киза.
Тёжянь вейхкса сятт нильгемонь колмоце и нилеце кизоня мон
тунь Инсара ошу учителькс тонафнема. Тонафнема кизотне
ульсть самай кальдяфне, но мяльсь ульсь фкя эряви тонафнемс.
Инсарав якаме ялга, ташта кой - каконь карьняса. Повфтасак
копорезт модамарь ведаркать, марожонь кшить и туят комсь
вете вайгяльбе ялга. Тяфта тонафнень колма кизот. Тонафнемазень
шумордайне тёжянь вейхкса сятт нильгемонь котоце кизоня и
прважамазь Мокшень Пою шачема – касома велезон покодема.
Макссть тейне лем «Начальнай школань учитель».
Васень покодема кизотнень пингста ульсь пяк стака. Тонафнема
куттне ульсть кальдяфт и якшапт, свет ашель, лувомс книгатне
ашесть сатне. Эста велеса библиотека ашель. Иттне щафт – каряфт
ташта нуланяса, пильгсост карьхть – пракстат. Иттнень мяльсноль
тонафнемс, ванцть и кулхцондсть од учительснон эса. Кизода –
кизос тонафнема васттне кармасть петевома. Меле вели эвондась
электричества. И тефне тусть сяда цебярьста. Эсь велесон мон
покодень нильгемонь киза, учителень работать пяк кельгине.
Иттневок кельгомазь. Шобдава учениконе ласькондсть эрь шиня
каршезон, сявондезь кядьстон сумказень, а конац кярьмоди
кядезон и тяфта мольхтяма школав. Иттне азонкшнезь эсь тевснон,
мезе тиендсть кудса, ульцяса. А мон салаваня радовондакшнень
лангозост, павазу иднятнень. Тняра кизос работазь Пою велень
школаса, эрь кудса монь ученикозе. Тейне савсь тонафнемс аф
аньцек иттнень, но синь тядяснон и аляснон. Ся пингть эрь
учительти максессть кемонь кудт ( десятидворка), эрявсь якамс
кудста – кудс и тонафнемс букватнень, хотя бы тонафтомс
ломаттнень росписснон путома. Тяда башка мон вятень морамань
кружок, политзанятият. Савсь тейне ётафтомс кувака и аф тёждя
ки. Но мон пяк кельгине эсь тевозень и учениконень. Семботь
тиендине сянкса, штоба иттне касольхть грамотнайхть, сталмода
аф пели ломанькс.
Монь трудозе апак приметак ашезь иляда. Казьфан лама
казняса. Макссть тейне лем «Отличник народного просвещения»,
« Педагогическяй трудонь ветеран», улихть почетнай грамотане,
и лама лия казнят. Тяни лама киза аф покодян школаса, но
тевнень сяда тов вятьсазь учениконе. Касфтонь колма стирьхть.
Синьге тусть эсь мельган, покодихть школаса. Эряйхть синь
мокшэрзянь крайса, сашендыхть инжикс шачема велезост.
Анна Михаловнань пара мялезонза, мес тяниень школьникне
сашендыхть тейнза аф аньцек лездома, но и чайда симома эсь
учительснон мархта.