Тропарь, кондак, молитва преподобномученице Екатерине

Месяца марта в 7-й день
Святыя преподобномученицы Екатерины
(Константиновой)
Тропарь, глас 4:
Любовию Христовою уязвившися,/ вся красная мира сего оставила
еси,/ и в терпении скорбей житие ангельское проходила еси./ Егда же прииде
испытания час,/ злобы мучителей не убоявшися,/ смерть вольную за Господа
прияла еси/ и во обители Небесныя вселилася еси./ Сего ради с любовию
вопием ти:/ радуйся, святая преподобномученице Екатерино,/ звездо
пресветлая,/ над весию Сходненскою возсиявшая.
Кондак, глас 2:
Лику святых жен подражающи,/ иноческия труды подъяла еси,/
преподобномученице славная Екатерино./ Егда же во дни гонений на веру
Христову/ обитель твою безбожнии разориша,/ призва тя Господь к
мученическому подвигу,/ егоже добропобедно скончала еси./ Ныне же,
Престолу Святыя Троицы предстоящи,/ моли спастися душам нашим.
Молитва
О, святая преподобномученице Екатерино, покровительнице града
нашего и Церкве Русския похвало!
Ты, от юности монашескаго жития возжелавши, в посте, бдении и
молитве служение твое усердно проходила еси. Егда же Церковь Христову
скорби и гонения лютая объяша, ты мученическую смерть мужественне
прияла еси и венцем Небесныя славы увенчалася еси. Темже, прославляюще
любовь твою ко Господу, укрепившаго тя во исповедании веры даже до
смерти, во умилении сердец наших взываем: поминай нас в молитвах твоих к
Богу, да утвердит в стране Российстей веру и благочестие, да дарует нам дух
покаяния, смирения и кротости, да возжжет в сердцах наших ревность о
славе Божией.
О, преподобномученице Екатерино! Моли Господа со всеми
новомученики Церкве Русския избавити нас междоусобныя брани, раздоров
и нестроений и низпослати мир на вся грады и веси христианския, да всеми
славится всечестное Имя дивнаго во святых Своих Бога, Отца и Сына и
Святаго Духа, во веки веков. Аминь.