Молитвы за Русь Святую

Молитвы за Русь Святую
Господи Иисусе Христе, Сыне Божий, Ты бо рекл еси пречистыми усты Твоими:
"Аминь глаголю вам, яко аще два от вас совещаета на земли о всякой вещи, еяже аще
просита, будет има от Отца Моего, Иже на небесах. Идеже бо еста два или трие собрани
во имя Мое, ту есмь посреди их". Непреложны словеса Твоя, Господи, милосердие Твое
неизреченно и человеколюбию Твоему несть конца. Сего ради молим Тя и стеняще
вопием Ти, Боже наш, даруй нам, рабом Твоим, всем русским православным христианом,
согласившимся просить Тя о скорби нашей, за страждущее Отечество наше и Церковь
Русскую, исполнение прошения нашего.
Боже великий и дивный, каяйся о злобах человеческих, возводяй низверженныя и
утверждаяй ниспадающия, не отрини молитв наших и воздыханий сердечных во время
сие тяжкое против смертоносного и богомерзкого духа антихристова: духа блуда и
наркомании, духа табакокурения и пиянства, духа всевозможных чувственных
развлечений и удовольствий, духа печали и уныния, духа тщеславия и гордости, духа
злобы и ненависти, духа лицемерия и лукавства, духа всевозможной ложной духовности,
силящегося запечатлеть народ наш на служение себе и отвергнуть нас от благодати
Твоей Бога Живаго и Истиннаго. Да не будет сего, Милостиве!
Помяни, Господи, милости, яже показал еси отцем нашим, разрушь коварство
диавола, восстающего на ны. Силою Креста Твоего даруй всем нам духа премудрости и
разума, духа совета и крепости, духа ведения и благочестия, духа страха Божия, да не
погибнем, обольщенные лукавством сатанинским. Воздвигни нам мужей веры, надежды
и любви, разума, мужества и силы, да не возмогут противитися все противляющиися
нам. Восстави нам, Боже, престол православных царей, да поставлен будет и земной
Удерживающий всякое зло и неправду, умножившиися в Отечестве нашем.
Боже Спасителю наш, сердцем сокрушенным к Тебе припадая, молим Тя:
обольщенныя обрати и на путь правый настави, малодушныя укрепи, маловерныя в вере
православной утверди и духом Твоея ревности воспламени, да не погибнем
запутавшиися в сетях вражиих. Сего ради к Тебе прибегаем, яко Ты еси Бог наш и нет
инаго разве Тебе. Но обаче не якоже мы хотим, но якоже Ты, Боже.
Да будет воля Твоя во веки. Аминь.
О мира Заступнице, Мати всепетая! Со страхом Божиим, верою и любовию
припадающе пред честною иконою Твоею, усердно молим Тя: не отврати Лица Твоего от
прибегающих к Тебе. Умоли, милосердная Мати Света, Сына Твоего и Бога нашего,
сладчайшего Господа нашего Иисуса Христа: да дарует униженному и разделенному
Отечеству нашему победу на враги, мир и благоденствие: да утвердит святую Церковь
Русскую и непозыблему соблюдет Ю от нестроений, расколов и ересей. Не имамы бо
иныя помощи, не имамы иныя надежды, разве Тебе, Пресвятая Дево: Ты еси всесильная
христиан Заступница пред Богом, праведный гнев Его на милость прелагающая. Избави
всех, с верою Тебе молящихся, от падений греховных, от навета злых человек, от
болезней и скорбей непомерных: от глада, губительства, труса, огня и меча; от
нашествия иноплеменных избави и междоусобныя брани сохрани. Даруй нам дух
сокрушения, смирение сердца, чистоту помышлений, испроси нам у Сына Твоего и Бога
нашего оставление согрешений наших и исправления греховныя жизни: да вси,
благодарне воспевающе величия Твоя, сподобимся Небеснаго Царствия и тамо со всеми
святыми прославим пречестное и великолепое Имя в Троице славимаго Бога, Отца и
Сына и Святаго Духа. Аминь.
О всеблаженнии и богомудрии угодницы Божии, подвиги своими Землю Русскую
освятившии и телеса своя, яко семя веры, в ней оставльшии, душами же своими престолу
Божию предстоящии и непрестанно о ней молящиися! Се ныне мы грешнии, меньшии
братия ваши, дерзаем приносити вам хвалебное пение. Величаем ваша великия подвиги,
духовнии воини Христовы, терпением и мужеством до конца врага низложившии и нас
от прелести и козней его избавляющии. Ублажаем ваше святое житие, светильницы
Божественнии, светом веры и добродетелей светящии и наша умы и сердца
богомудренно озаряющии. Прославляем ваша великая чудеса, цвети райстии, в стране
нашей северней прекрасно процветшии и ароматы дарований и чудес повсюду
благоухающии. Восхваляем вашу Богоподражательную любовь, предстателие наши и
покровителие, и уповающе на помощь вашу припадаем к вам и вопием:
Равноапостольнии просветителие наши! Споспешствуйте людем Земли Русския
преданную вами веру православную твердо содержати, да спасительное семя, вами
всеянное, не изсушено будет зноем неверия, лжеверия или зловерия, но дождем Божия
поспешения напоенное плод изобильный еще да принесет. Святителие Христови!
Молитвами вашими утвердите Церковь Русскую и ереси, расколы и нестроения в Ней
потребите, расточенныя овцы воедино соберите и от всяких волков, во одежде овчей в
стадо Христово входящих, оградите. Преподобнии отцы! Сохраните нас от прелестей
мира сего лукаваго, да отвергшеся себе и вземше крест свой последуем Христу,
распенше плоть свою со страстьми и похотьми, носяще тяготы друг друга. Благовернии
князие! Воззрите милостивно на земное Отечество ваше и все нечестия и соблазны, в нем
ныне сущия, оружием молитв ваших потребите, да якоже древле, тако и ныне, и в
грядущее время прославляется на Руси Святей имя Господне. Святии Царственные
Страстотерпцы и все стратотерпцы российстии преславнии! Укрепите нас в
мужественном стоянии даже до крове за веру православную, да ни скорбь, ни теснота, ни
гонения, ни глад, ни нагота, ни беда, ни меч не возмогут нас разлучити от любве Божия,
яже о Христе Иисусе, Господе нашем. Блаженнии, Христа ради юродивии и праведнии!
Посрамите мудрость века сего, возносящуюся на разум Божий; нам же помозите
спасительным буйством Креста Христова утвердившеся, от соблазнов мудрости мирския
незыблемым быти, горнее присно, а не земное помышляти. Богомудрыя жены, в
немощнем естестве подвиги велия явившия! Молитеся, да дух вашея любви ко Господу и
ревность о угождении Ему и о своем и ближняго спасении не оскудевают и в нас. Вси
святии сродницы наши, от лет древних просиявшии и в последния дни подвизавшиися,
явленнии и неявленнии, ведомии и неведомии! Помяните нашу немощь и уничижение и
молитвами вашими испросите у Христа Бога нашего, да и мы, безбедно преплывше
житейскую пучину и невредимо соблюдше сокровище веры, в пристанище вечнаго
спасения достигнем и в блаженных обителех горняго Отечества вкупе с вами и со всеми
угодившими Ему от века святыми водворимся, благодатию и человеколюбием Спасителя
Господа нашего Иисуса Христа, Емуже со превечным Отцем и пресвятым Духом
подобает честь и поклонение ныне и присно и во веки веков. Аминь.